Ble i gael cyngor cyfreithiol
Gallwch gael cyngor cyfreithiol ar-lein, dros y ffôn neu wyneb yn wyneb. Efallai y byddwch hefyd yn gymwys am gymorth cyfreithiol i helpu i dalu am gostau cyfreithiol. Dysgwch fwy am ble i fynd am gymorth a beth i’w ddisgwyl pan fyddwch yn siarad gyda chynghorydd cyfreithiol.
Cael cymorth cyfreithiol
Dylech holi i weld a allwch gael cymorth cyfreithiol i helpu gyda’ch problem. Cynllun yw cymorth cyfreithiol sy’n helpu pobl i dalu am gyngor cyfreithiol. Efallai y byddwch yn cael cymorth cyfreithiol os gallwch gwrdd ag amodau arbennig. I gael gwybod mwy am gymorth cyfreithiol, cliciwch ar y dolenni isod.
Sefydliadau sy’n cynnig help a chyngor di-dâl
Cyngor Cyfreithiol Cymunedol
Ffôn: 0845 345 4 345
Oriau agor: Dydd Llun tan ddydd Gwener 9.00am tan 8.00pm. Dydd Sadwrn 9.00am tan 12.30pm.
Mae’r sefydliadau isod yn cynnig cyngor annibynnol a di-dâl ar eich problemau cyfreithiol a’r ffordd orau o ddelio gyda nhw.
Cyngor Cyfreithiol Cymunedol
Gall y gwasanaeth Cyngor Cyfreithiol Cymunedol roi help neu gyngor cyfreithiol am ddim dros y ffôn. Gallant helpu gyda phroblemau teuluol, dyledion, tai, cyflogaeth, addysg, budd-daliadau lles a chredydau treth.
Bydd y gwasanaeth hwn naill ai'n eich helpu i ddod o hyd i gynghorydd lleol neu'n gwirio eich cymhwyster ac yn eich rhoi mewn cysylltiad â chynghorydd arbenigol annibynnol dros y ffôn i'ch helpu gyda'ch problem. Os nad ydych yn gymwys i gael cymorth cyfreithiol, gall y gwasanaeth Cyngor Cyfreithiol Cymunedol eich rhoi mewn cysylltiad â rhywun a fydd yn gallu eich helpu.
Ffôn: 0845 345 4 345
Oriau agor: Dydd Llun tan ddydd Gwener 9.00am tan 8.00pm. Dydd Sadwrn 9.00am tan 12.30pm.
Mae’r galwadau’n costio 4 ceiniog y funud o linell dir BT. Mae galwadau o ffonau symudol fel arfer yn costio mwy. Os ydych yn poeni am gost yr alwad, gallant eich ffonio’n ôl.
Gallwch hefyd decstio ‘legalaid’ yna eich enw at 80010 a bydd y gwasanaeth Cyngor Cyfreithiol Cymunedol yn eich ffonio’n ôl o fewn 24 awr.
- Gofyn i rywun eich ffonio’n ôl – Cyngor Cyfreithiol Cymunedol
- Y gwasanaeth Cyngor Cyfreithiol Cymunedol
Cyngor ar Bopeth
Gall Cyngor ar Bopeth eich helpu gyda phroblemau cyfreithiol, ariannol neu broblemau eraill drwy roi cyngor cyfrinachol a gwybodaeth am ddim o dros 3,200 o ganolfannau ledled y wlad.
- Cyngor ar Bopeth Gogledd Iwerddon
- Gwefan Cyngor ar Bopeth yr Alban
- Dod o hyd i’ch swyddfa Cyngor ar Bopeth leol
Canolfannau Cyfreithiol
Os bydd achos cyfreithiol efallai’n cael ei ddwyn yn eich erbyn gallwch gael cyngor annibynnol a di-dâl gan eich Canolfan Gyfreithiol leol.
Cael cyngor cyfreithiol yn Iaith Arwyddion Prydain
Mae Cyngor Cyfreithiol Cymunedol mewn partneriaeth â’r Gymdeithas Frenhinol dros Bobl Fyddar (RAD) yn darparu cyngor cyfreithiol arbenigol, annibynnol yn Iaith Arwyddion Prydain.
Os ydych yn gymwys i gael cymorth cyfreithiol, gallwch ddefnyddio’r gwasanaeth gwe-gamera ar eu gwefan i gael cyngor cyfreithiol.
Cael cyngor cyfreithiol os nad Saesneg yw eich iaith gyntaf
Mae gan y llinell gymorth gan Gyngor Cyfreithiol Cymunedol wasanaeth cyfieithu di-dâl sy’n rhoi cyngor cyfreithiol mewn 170 o ieithoedd.
Mae gan Gyngor ar Bopeth wybodaeth mewn gwahanol ieithoedd, gan gynnwys Bengaleg, Pwyleg a Gujarateg.
- Gofyn i rywun eich ffonio’n ôl – Cyngor Cyfreithiol Cymunedol
- Cyngor ar Bopeth – gwybodaeth mewn gwahanol ieithoedd
Cael cyngor cyfreithiol ar broblemau ariannol, tai ac fel defnyddiwr
Mae rhai problemau cyfreithiol yn gofyn am gyngor cyfreithiol arbenigol. Gallai'r rhain gynnwys problemau tai, ariannol neu fel defnyddiwr. Bydd cyngor arbenigol yn eich helpu i sicrhau bod eich problem yn cael sylw’n fwy effeithiol. Cliciwch ar y ddolen isod i ddod o hyd i sefydliadau sy'n cynnig cyngor arbenigol.
Mynd at gyfreithiwr neu gynghorydd cyfreithiol
Gallwch gael help a chyngor cyfreithiol gan gyfreithiwr neu gynghorydd cyfreithiol. Gallant ddweud wrthych beth yw eich gwahanol opsiynau a’ch helpu i baratoi eich achos os bydd angen mynd i’r llys.
Pan fyddwch yn siarad gyntaf gyda’ch cynghorydd, dylech gofio y bydd angen ichi gael y wybodaeth ganlynol arnoch:
- copïau o unrhyw lythyrau yng nghyswllt eich problem
- copïau o unrhyw ddogfennau llys yng nghyswllt eich problem
- unrhyw ddogfennau eraill a allai helpu’r cynghorydd (er enghraifft, cytundebau tenantiaeth, tystysgrifau geni neu briodas)
Os credwch eich bod efallai’n gymwys i gael cymorth cyfreithiol, dylech hefyd fynd â’r wybodaeth ganlynol gyda chi:
- gwybodaeth am eich incwm a'ch treuliau (er enghraifft slipiau cyflog, datganiadau banc) chi a'ch partner
- tystiolaeth o unrhyw fudd-daliadau yr ydych yn eu derbyn
- manylion unrhyw gynilion sydd gennych
- eich rhif Yswiriant Gwladol
Beth ddylai eich cynghorydd cyfreithiol ei egluro:
- eich opsiynau ar gyfer datrys y broblem
- eich siawns o gael y canlyniad y byddech am ei gael
- a fyddai’n rhaid ichi efallai fynd i’r llys
- eich cymhwyster i dderbyn cymorth cyfreithiol a ffyrdd eraill o dalu costau cyfreithiol
- beth allai fod angen ichi ei dalu os byddwch yn colli eich achos
- sut i gwyno os ydych yn anhapus gyda’r cyngor cyfreithiol yr ydych yn ei dderbyn
Cyn ichi adael y cyfarfod, dylech wybod:
- beth sydd angen ichi ei wneud nesaf
- beth fydd eich cynghorydd yn ei wneud nesaf
- a oes angen ichi roi mwy o wybodaeth a dogfennau i'ch cynghorydd
- a oes unrhyw ddyddiadau neu derfynau amser pwysig sydd angen ichi wybod amdanynt
- pryd fydd eich cynghorydd yn cysylltu â chi nesaf, neu bryd fydd eich cyfarfod nesaf efallai
- faint o amser fydd eich achos yn ei gymryd yn eu barn nhw
Rhaid ichi sôn am bopeth am eich achos wrth eich cynghorydd cyfreithiol, fel y medrant eich helpu y gorau y gallant. Bydd unrhyw wybodaeth a roddwch iddynt yn cael ei chadw'n breifat a chyfrinachol.
Diweddarwyd diwethaf: 09 Mai 2011